Grape wine-ah sorkarin a hawi lam tichiang ngam se

Mizoram Liquor (Prohi­bition) Draft Rules, 2022 chu Chief Minister hoa council of minister ṭhukhawm chuan a pawm a, he rules pawm tak hian grape wine siam leh zawrh pawh a khap a ni. Hetihlai hian Champhai leh Hnahlana winery-ah chuan sorkar hriatthiamnain wine siam mek a ni thung.

Mizoram sorkar chuan dan angin zu a khap a, zu mai ni lo, grape wine siam leh zawrh khapna pawh a pawm tawh a ni. Nimahsela Mizorama kuthna­thawktu grape chingtute hmakhua ngaiin tunah hian wine siam chu a 'hrethiam' thung niin a lang. Sorkarin a khapna hnuaia inziak thil a hrethiam hi grape chingtute tan a lawmawm rualin an khap bawk si avangin a hralhna lamah harsatna an tawk thung a, thil kal dan hi hriatthiam a harsa ta hle a ni.

Sorkar hian a hawi lam hi huaisen takin tichiang law law se grape chingtute tan pawh awm thiam a awl zawkin a rinawm a; sorkarin kohhran hruaitute leh khawtlang hruaitute an rawn hnuah an duh angin grape wine siam leh zawrh chu a han khap phawt a, chumi hnuaia 'hriatthiamna' anga han kal leh hnuhnawh te hi thil mak tak a ni.

Grape chingtute hian eizawnna atan thlangin an hun leh tha, sum leh pai an lo seng nasa tawh si a, a grape ber an neih tawh sa avangin 'hriatthiam' an nih chhung chu an tan grape wine siam zel mai bak eizawnna dang dap a harsa tawh si a; nimahsela khap ni si, 'hriatthiam' ni bawk karah hian tun hmaa an dinhmun an phak ta lo hle niin a lang.

Mizoram sorkar hian grape wine siam leh zawrh phalsak leh khap tur chungchangah huaisen takin hawi lam nei ngam law law se a ṭha ngawt mai.