SEDP kalphung tur

SEDP Governing Board chu tun hnai khan Chief Ministry hoin an ṭhukhawm a, SEDP hnuaia 'family oriented' hmalakna hnuaia trade hrang hrang thlan theih leh a kalphung tur chhawp chhuahte an thlirho a, siam ṭhat ngai leh belh ngaite an sawiho.

Mizoram mipui ṭhahnem tak innghahna chu SEDP a taka kalpui hun tur hi a ni a, chhungkaw tam tak phei chuan 'cheng nuai thum sem' hi tun thlengin an la nghak a ni.

Sorkar hian a takin cheng nuai thum hi a sem thei lo tih chu a chiang tawh a, tuna SEDP kalpui dan turah pawh a pawisa an sawi rik chu cheng nuai khat pawh a tling ta lo; kum 2018 inthlan dawna an au hle nen chuan a inang ta chiah lo.

Engpawhnise tu sorkar tan pawha theih loh tur chiang sa cheng nuai thum sem nghah ai chuan, tuna sorkarin SEDP kalpui a tum dan hi ngun zawka zir a, ṭangkai taka hman theih dan ngaihtuah hi a finthlak ber tawh ang.

Chhungkaw kâwk zawng leh eizawnnaa chantir theih tur zawnga ruahmanna a awm hi a lawmawm a, a dawngtu chhung­kuaten an din chhuahpui thamin kalpui se a ṭha ngawt ang.

Chutihlaiin sor­kar kum chawhnu lama SEDP kal­phung tur an la chhawp chhuak chauh te, siam ṭhat ngai leh belh ngai an la thlir chauh mai hi chu sorkar tûk aṭanga bawng insi ang phata ṭan tuma insawi te tihah chuan a inhmeh chiah lo a; chuti chung pawhin mipui hi chuan a nghah hi an thei a, SEDP ṭha leh ṭangkai tak nghah chhuah tur hi awm hram se a lawmawm ang.