Mizoram mau

Azadi Ka Amrit Mahotsav North East Festival pualin Horticulture Department chuan tun hnai khan Program for Round Table on Bamboo an buatsaih.

He huna thusawitu Horticul­ture Development Board Vice Chairman chuan, kum hnih kal ta chhungin Horticulture Depart­ment-in pilot project atan Dendrobium Brandisii leh D. Sikkimensis planta­tion-ah nasa takin ṭan a la tih a sawi a; hmarchhak state zingah Mizoramin bamboo diversity a nei sang ber a, mau chi 30 lai a nei a, nimahsela mau tih­hmasawnna atan technology, industrial infrastructure leh thil dangahte ṭan lak a ngai tih sawiin Mizorama awm Melocanna baccifera-in mipui mamawh a phuhrûk zawh loh avangin sorkarin bamboo chi dangah ṭan a lak thu a sawi.

Mizoramah mau a tam tehlul nen state pawn aṭanga man to taka mau chi dang lakluh a, Mizorama tihpun tum a, a puitlin hnua phurh chhuaha hralh leh tumin sorkarin nasa takin ṭan a la. Kan mau neih sâ hmanna lam aia a chi lakluh aṭanga bul ṭan hi mi tam takin an sawisel a; nimahsela Horticulture Development Board Vice Chairman sawi hmang hian kan mau neih sate hian kan mamawh a lo phuhruk zo lo a ni awm e.

Hetihlai hian tun thleng hian Mizoramah hian kan mau neih sa lo hi kan la hmang meuh lo niin a lang a, state pawn aṭanga mau kan lakluh hi sawi tur a la vang hle ang. In sakna, huan hungna, mau leh hnang hmanga thil siam leh ṭul dangah pawh Mizorama mau/ rua awm sâ deuh zel kan la hmang a ni. Heti chunga kan mamawh a phuhru lo han tih pawh hi mipui min hrilhfiah thui deuh chu a ṭul awm e.

Engpawhnise Mizoram sorkar flagship programme chu rua (mau) a nih thu kan Chief Minister-in a sawi tawh a, mi state aṭanga mau/ rua lakluh lam aiin kan neih sâ hman ṭangkai theih dan hi kalpui zel theih ni se. Mizorama mau awm sâ zozaite hi intodelh leh din chhuahpui tham a nih loh chuan, a chi lakluh leh phun chawp hmanga intodelh chu a huphurhawm lehzual ang.