Sarang hman phal lohna

Tun hnai khan India-in zalenna a hmuh champhaphak vawi 75-na puala hun buat­saihah sarang/ plastic micron 120 aia pan chu Mizoramah hman phal a nih tawh loh thu tarlan a ni a, sorkar programme buatsaihah Aizawla YMA branch 14 aiawhte'n sarang pan lutuk chi, hman khat daih sarang hmang lo turin intiamna an nei.

Aizawl Municipal Cor­poration chuan August 1, 2019 khan Aizawl khaw­pui chhungah polythene hman khap thu an lo puang tawh a, October 2, 2019 khan Aizawl pawh 'Plastic Free City'-ah puangin plastic micron 50 aia pan hman an lo khap tawh a, chumai ni loin AMC Enforcement Staff-te'n polythene hmang leh hmang lo hi an endik hial a ni.

Aizawl khawpuiah hian polythene bag kan tih mai, sorkarin a khap tak hi tun thleng hian hmuh tur a la awm reng a, a khaptu lamin khapna thupek chhuah bawk mah se a kenkawhna lama chak tawk lo pawh a ni mai thei a, tun thlengin tihrêm a la ni lo.

Tunah India hun pawimawh denchhenin Aizawl Bawrhsap hoin hma an la thar leh dawn a ni a, thil ṭha tak bul kan ṭan tawh hi a bawhzuina lamah kan chak a ngai hle a ni.

Thuneitu lamin sarang hman an khap avangin mi ṭhenkhat chuan a thlakna tur cotton bag, paper bag leh thil dang siamin hma an lo la ve nghal chat a; nimahsela a ruk leh ualau angreng taka polythene bag kan tih mai hman tur a la awm cheu avangin anni lam tan pawh harsatna a awm ve mek bawk.

AMC-in bul an ṭan tawh a, tunah hmalakna thar a awm leh ta bawk a, sarang hman phal lohna thupek hi a taka bawhzui ni se a ṭha ngawt ang.