Zangnadawmna pek chhuah ni se

Vawk pùl hri, African Swine Fever (ASF) vanga kum 2021 chhunga vawk suat neitute hnena zangnadawmna pek tur zinga a zatve, Rs 5,84,97,000 chu Animal Husbandry & Veterinary (AH&Vety) depart­ment-in Finance department-ah an dil mek a, an dawn theih hun tur hriat a la ni lo.

Hetih lai hian, kum 2022-a vawk suat neitute chu sor­kar laipuiah zang­nadawmna dilsak a ni leh dawn.

Mizoram sorkar hian vawk pul hri avanga harsatna tawkte pawisa tur hi tunah hian a dawng tawh a nih chuan a pek chhuah lam hi a hmanhmawh tur a ni a, sum lo kal hi a hmanna tur dik taka hman mai a tawk lo a, rang taka pek chhuah hi a ṭul takzet a ni.

Vawk vulhtute hian an vawk an chân tawh a, pûl hri avangin an suat zo tawh. Mizoram sorkarin zangnadawmna tur sum sorkar laipuiah a dil a, anni hian cheng vaibelchhe 5 zet mai an rawn pe tawh a, heti zat bawk hi Mizoram sorkarin a tum ve tur a ni.

Mizoram sorkar hian vawk vulhtute zangnadawmna tur sum a pek ve tur cheng vaibelchhe 5 hi a la pe ve lo mai ni loin pawisa lo kal sâ pawh a la sem chhuak lo hi a zialo hle a ni.

Sorkar sum che vêl leh a lâk chhuah hian hun duh deuh ṭhin mah se, sorkarin a ngai pawimawh a nih chuan tih theih dan a awm a; vawk vulhtute sum tur liau liau lo kal hi pawh pen a thiang lo a, tihkhawmuan pawh a dik lo ang - a rang thei ang berin sem chhuah ni rawh se.