Inzirna atan Kamrul-a i hmang ang u

Kamrul Islam Laskar, Ṭhuampui, Aizawl-in Kamlova Chhangte s/o Tlangchhuana Chhangte tih hminga Scheduled Tribe Certificate a neih chu State Scrutiny Committee for Verification of Community Certificates (SSCVCC) chuan dan dik loah ngaiin a titawp.

Mi ṭhahnem­ngaiten Kamrul Laskar-a'n Sche­duled Tribe Certi­ficate a lo nei leh chumi avanga hamṭhatna tam tak a nei chu dik loah ngaiin SSCVCC-ah hian an thlen a ni. Kamrul Laskar hi KR Construction neitu a ni a, Mizoram sorkar hnuaiah hna lian tak tak ṭhahnem tak a thawk a, Lengpui Airport chei ṭhatnaah ringawt pawh cheng vaibelchhe 19 chuang man hna a thawk.

Lengpui Airport-a a hna­thawh hi vanduaithlak takin tlem lai khan a chim a; he hna inpek danah hian thil fel lo a awma ngaiin pawl pakhat, 'Mizoram First' chuan thubuai an lo thehlut tawh nghe nghe a ni.

Kamrul-a hian Scheduled Tribe nihna a neih vangin thil tam takah hamṭhatna a lo nei tawh a, tunah erawh chuan Income Tax pawh a pek a ngai tawh dâwn niin a lang. Hei mai hi a ni lo a, Scheduled Tribe Certificate nei tura a pa ni lo pa anga a ziak pawh hi thil fel lo tak a ni. Mizo contractor heti zat an awm chunga hetiang miin kan sorkar hnuaia hna heti zozai a lo thawk rengte mai pawh hi a mak lehzual.

Engpawhnise Kamrul Laskar hian ST Certificate pahnih ngawt a lo nei a, hemi kawngah hian sorkar pisaa thawktu lam pawh an fimkhur lehzual a ṭul. Engkim mai hi politics zawnga herin political party-te inchirhthehna remchangah kan chantir fo a, chutih rual chuan kan offi­cial lam pawhin dan hnuaia theih loh na nâ nâ chu eng anga nawrna/ tihluih­na pawh awm se Mizo hnam tana pawi theiah chuan huaisen takin dodal ngam tawh se a lawmawm ang.

Kamrul-a hian ST Certificate pahnih lai neiin hamṭhatna eng emaw zat a lo nei hman tawh a, hetiang hi thil thleng nawn thei reng a nih avangin inzirna leh fimkhur phahna atan i hmang ang u.