One District, One Crop

Agriculture minister chuan, thlai man a tlàwm zawk theihna turin Vegetable Market Chain kalpui tum a ni a, hmalak mek a nih thu a sawi a; thlaia intodelh a nih theih nan 'One District, One Crop' kalpui an tum bawk tih sawiin, "Mizorama kan thar ve theih reng, a bik takin alu, dailuah leh tomato-ahte intodelh a nih theih nan theihtawp chhuah kan tum. Heng ringawt pawh hi state dang aṭanga lak luhna atan kan séng hnem lutuk. Chuvangin, a district tawpa thlai chi khat chíng tura hmalak kan tum a ni," a ti. 

Tun hnaia sorkar thil tih tum zinga lawm­awm ber pawl nia lang chu 'One District, One Crop' kalpui tumna awm hi a ni awm e. Tunah hi chuan kan pi leh pute hunlai aṭang tawhin kan loah thil te tham te te kan ching lawr a, chhungkaw kham khawp thar chhuah thil harsa ni lo mah se hlawk thama thil thar a harsa em em a, kuthnathawktute tun thlengin dinhmun harsa takah an la awm phah tih pawhin a sawi theih hial awm e. 

Kan chenna hmun mil tura sum chang thlai kan thar chhuah thiam hma loh chuan kuthnathawktute dinhmun hi a kâng thei tak tak dawnin a lang lo a, kuthnathawktu hlawhtling tlem te awmte media lama chhuang taka pholanga kan kawm kual luai luai laiin kuthnathawktu tam zawkte dinhmun chu a la hniam hle a; a thawkrim leh a taimate hi a rethei zawkah an la ṭang a ni. 

Sorkarin district tinin an chin uar tur bik thlai kalpui a tum hi thil lawmawm tak a ni a, hei hi a tihlawhtling thei ngai a nih chuan loneitute dinhmun thui tak a siam ṭha theiin rinawm. A hlawma thil thar chhuah piah lamah a hralh dan tur thlengin sorkar hian a enpui a ngai dawn a, hlawk tham tak taka kalpui tur chuan Mizoram pawn thlenga hralh theih tur chin uar a ṭha hle ang. 

Hetihlai hian sorkarin kum hniha  hman zawh dawnah 'One District, One Crop' hi an sawi ri chauh a, ruahmanna awm sa bawhzui ni lem lo, ngaih­tuah chhuah chawp kalpui mai mai a nih erawh chuan a hlawhtling lo palh thei. 

Mizoramah hian loneitute tana ṭha âwm tak hlawhtling ta lem lo hi a awm nual a, 'One Dis­trict, One Crop' erawh a hlawh­tlin ngei theihna turin sor­karin ṭan la se, tuna tumna awm hi a tak chantir rawh se.