Zangnadawmna leh Mizoram

National Highway no. 06 zauhnaa zangnadawmna chugnchangah Keifang venglai Village Coulcil chu dik lo taka thil tiah ngaiin Local Administration department chuan tun hnai khan a ṭhiat a; Keifang Land Owners Association-in lungawi lohna an thehluh kal zelah chhui chian an nih hnuah VC hi ṭhiah an ni.

Mizorama buaina leh harsatna tam tak hi chu zangnadawmna kalpui aṭanga chhuak a ni a, sum dik lo siam tum avanga buai an tam tawh hle. Tun hnaiah Mizoram hmun hrang hrangah kawngpui zauhnaa zangnadawmna dawng an tam hle a, a dan dik taka dawng an awm rualin dan dik tawk loa dawng an awm tel ṭhin hi a pawi hle.

Kawngpuiin a tan tlang tur ram chu a hre chiangte'n a neitu dik takte hnen aṭangin an lei chhawng a, zangnadawmna hmangin sum tam zawk an la thei dawn tih hriat avangin sum siamna atana hmang an awm ṭhin. Ram ṭhenkhatte phei chu a hmain sorkarah chhinchhiah (pass siam) a ni lo chungin a tan tlang dawn tih hriat hnuah pass siam chawp te a ni a, hengtiang hmanga sum tam tak tak siam an awm ṭhin.

Kolasib District lamah pawh kawngpui laih ṭan a nih hma hauh aṭangin buaina hi a awm der tawh a, thuneitu lamin chhang pialin insawifiah ṭhin mah se, zangnadawmna dik lo taka dawng leh a hlawkna teltu an awm tel zel hi a pawi hle a ni.

Nakin lawkah zangna­dawmna dawngtu list a lo chhuak ang a, a list-a chuang lem lo a taka pawisa dawngtu politician, official leh mimir zingah an awm leh ngeiin a rinawm. Zangnadawmna lak dawn hian mi pakhat maiin tih theih a ni lo a, mi hrang hrang an inthurual a ṭul a, chutianga thil dik lo ti tura inthurual ṭhin kan awm hi a pawi hle a ni.