Fur lo thleng tur atan inbuatsaih
Kum dang ang a nih chuan Mizoramah May thla tawp lam aṭangin ruah a tla tam leh ang a, September thla vel thleng chu ruahtui kan dawng tam leh tura ngaih a ni. Kum sawm chhunga Mizoramin ruahtui kan dawn ṭhin dan tlangpui chu 2000 mm vel nia ngaih a ni a, kum tin ruahtui tlak dan hi inang lo mah se a danglam tam lo tura ngaih a ni.
Hemi a nih avang hian May thla tawp lam aṭanga inṭanin thla nga chhung vel hi Mizoramah ruahtui a tla tam leh dawn a, leimin vanga chhiatna tam tak thleng leh thei a nih avangin ruahmanna ṭha tak nen fur ruahtui tla tur hi dawngsawng ve thei tawh ila a duhawm.
Fur lai hian ruahtui vangin chhiatna a thleng fo tawh ṭhin a, malsawm ruahtui ni tura kan ngaih hi chhiatna thlentu a nih leh ṭhin avangin kuminah chuan ruahmanna ṭha tak nen furpui hi hmachhawn tum ila, ruah vanga chhiatna a thlen fo tawh loh nan mitinte in buatsaih ang u.
Kum dang ang a nih chuan fur khaw cheng rei deuh pawh kan hmachhawn leh ngei dawn a, ruahtui khawl lamah te pawh ṭan la thar ang ila. Fur kan hmachhawn tawh ṭhinah chhiatna thlen hnuah bialtu MLA ten ṭanpuina awm thei ang ang an sem a, mawng pawh hung hman mang loin an buai viau ṭhin.
Chhiatna a thlen hnua silpouline leh ṭanpuina awm thei ang ang dap chiam ringawt tawh loin ruahmanna ṭha zawk neih theih tawh ni se. Hemi atan hian sorkarin mipui hnenah fimkhur zawka furpui kan hmachhawn theih nan awareness te neih ni se, chhiatna tlem zawk nen hlawk zawkin furpui hmachhawn i tum ang u.