Agriculture Minister hmathlir

Agriculture Minister chuan tun hnaia a thusawiah Mizoram sorkarin vaimim leh bekang hralhna tur hre lawkin hma a la tih a sawi a, Ministry of Agriculture dawr a nih thu leh price support pek ṭawngkama an tiam thu sawiin MAHFED chu a leitua an hman theih thu a sawi. Minister hian telhawng pawi­mawhna sawiin tuna nuihzattute hian nakinah a ṭhatna an la hriat dawn thu a sawi.

Mizote zingah thil a nihna tak hre loa tawngpawng sawisel ching kan awm ṭhin a, a bikin politics-a ṭan lam neih hian thil a nihna finfiah hmaa sawisel leh phun ching an tam ṭhin. SEDP kal tlanga vaimim chi sem pawh sawiselna a lian hle a, hei hi an hralhna tur leh a kalpui zel dan tur an hriat loh vang pawh a ni thei a; hemi kawngah hian sorkar pawh a ṭan a ngai a, vaimim a chintir chiam hian a hralhna lam hi tun aia uara tlangaupui a ṭha bawk ang.

Telhawng chin chungchang pawh hi sorkar lam chuan a ṭhatna leh a ṭangkai dan tur an hrethiam sa a, chutih rualin a sawiseltu pawl pawh an awm. A sawiseltu leh nuihzattu lam hi a chinchang hre ve lote leh sorkar sawisel tum hrim hrim te pawh an ni maithei a, anni hriatah a kalpui dan tur uar zawka puanzar a ṭha ang.

Agriculture Minis­ter-in thlirna thui tak neiin rua­hmanna a kalpui mek a, a sawiseltute chhânga sorkar thil kalpui a dikzia lantir a, hlawhtlinna hmuh hlan a nghah­hlelh­awm viau.

Minister sawi anga an hlawh­tlinpui theih chuan tuna sawiseltute hian an la fak leh zawk ngei ang - he thil a thlen theihna tur hian sorkarin hmabak ko tak a nei thung a ni.