Mizoram chhungah Assam Police duty post

Vairengte Mautuai Zaua huan pakhatah Assam Police-te chuan duty post an lo siam a, hei hi Mizoram sorkar beng a thlen hnuah Assam lam nen indawr zuiin duty post hi ṭhiah a ni dawn lo a, chutih rualin Assam lam hi hma thar lak phalsak an ni bik lo.

Tunah chuan huan neitute hi huan an kal dawnin Dholai OC-in a siamsak ID card an hman a ngai tawh a ni. He mi piah lamah hian hnathawk tur ni lo ram kal satliah chu heng huanahte hian kal lo se an duh thu Assam Police lam hian an sawi. He huan neitu hian Mizoram sorkar aṭangin LSC a nei thlap a ni.

Thil lang chiang tak chu Mizoram chhungah Assam Police lamin duty post thar an siam belh a, chumi piah lamah chuan huan neitute an huan kal tur pawh Assam Police phalna an neih a ngai tawh a, a nihna takah chuan kan ram min chhuhsak ṭhen tih loh rual a ni ta lo.

Kan ram chin hi zawi zawiin kan chân chhunzawm zel chu a ni phawt mai a, hmalakna hrang hrang a awm thu kan hriat laiin a taka kan ram chhung pawh kan humhalh theih loh a, a tawlh zawka kan ṭan zel chuan ram leh hnam tan thil pawi tak a ni ang.