Bazar sakna K-Deposit-a dah leh mipui

Aizawl South II bialtu MLA chuan Aizawl Bazarpui (Aizawl City Centre Annexe) sakna sum chu sorkarin K-Deposit lama dah a nih vangin hna a khaihlak thu a sawi a, chhungkaw 2,000 chuangin eizawnna atana an hman bazarpui sak hna chawlhsan a nihlaiin sorkarin Kamrul-a hnenah cheng vaibelchhe tam tak man hna a pe thung niin a sawi.

RTI Act hmanga zawhna chhannaa a lan dan chuan bazar sakna tur sum hi a vaiin K-Deposit-ah dah a nih thu leh, "lak chhuah mai hi sorkar sum harsat lai a nih avangin a harsa deuh a ni," tiin an chhang.

Bazar sakna tur sum hi Congress hunlai khan cheng nuai 3,641.59 dah a ni a, a hmunhma laih hnate chu ṭan tawh mah se a chhunzawmna tur sum sorkarin K-Deposit lamah a dah a ni.

Sorkarin K-Deposit-ah pawisa a dah hian a nihna takah chuan Aizawl City Centre Annexe sakna tur sum dah sa hi a nihna tura hmang loin thil dangah a hmang pêng a, pawisa awm huna hnawh khah turin an hmang pûk tihna a ni ber.

Sorkar hian pawisa a nei lo tawp ni loin a ngaih pawimawhnaah chuan pawisa hi an hmang reng tho a, Aizawl Bazarpui sak hi an ngai pawimawh tawk lo tihna a ni.

MLA-in a sawi chhuah ang hian lengpui Airport chei ṭhat hi hna hmanhmawh thlak ber niin a lang lem lo. Hripui lenlai pawha chawlhsan lo leh a hna pek dana thubuai thehluh ngai khawpin an hmanhmawh a, pawisa pawh dah a ni.

Hetihlaia chhungkaw ṭhahnem takin eizawnna an inṭawmna bazar sak hna atan pawisa awm sa pawh pen a ni ta hi sorkar hian a ngai pawimawh tawk lo a, a chhawrtu mipui pawh a dah pawimawh lo tiin a puh theih hial ang.