Sorkar thikthu chhiatna social media

Ramria police duty zinga mi chuan an duty-na hmunah tui a nut thu leh ramria duty-te'n tui an mamawh thu video a thehdarh a, hei vang hian suspend a ni a, police dang pathumte pawh insawifiah tura tih an ni. Congress party ṭhalai hruaitute chuan he suspend-na order hi sût turin police hotute an ngen.

Tun hnaiah social media hman dik loh avanga harsatna tawk mi tam tak an awm tawh a, ṭul loa buaina thlentu a nih ṭhin avangin kan fimkhur tlan a ngai hle.

Sorkar hnathawk tan chuan mahni hnathawhna kaih­hnawihah chuan fimkhur a ṭul hle a, social media-a kan thil thehdarh turte hi kan thlitfim a pawi­mawh hle a ni.

Hetihlai hian thu­nei­tu lam pawhin thutlukna an siam hmain fim takin an ngaihtuah ve bawk tur a ni a, huatthu chhe tak sorkar anga kan sorkar a lan mai lohna turin uluk taka ngaihtuahna sen a ṭha hle. Ramri buaiah hian kan police-te zingah ngei pawh tihlan loh atana ṭha zawk mipui hmuh theiha tilang an awm nual tawh a, kan ṭhenawm state police-te kaptu niawm taka ngaih theih an inkap zo hlim an silaite nena thlalak leh video hmuh tur a lo awm tawh a nih kha.

Tun ṭum thil thleng hi sorkar hnathawk leh mipui nawlpui pawhin inenfiahna atan hmang ila, kan hnathawh azira fimkhur lehzual turte pawh kan awm thei. Thil thleng zawng zawng social media lama thehdarh loa thuneitute hriattir hmasak a finthlak ang.

Hetihlai hian kan sorkar pawhin zau takin thil a thlir thiam a ṭha a, insiam ṭhat theih­na tur thilah chuan huat tur zawng loa kalpui a finthlak ang a; mimal, pawl leh sorkar thlengin social media hman leh a laka kan rilru put dan turah inzir kan la ngai hle niin a lang.