Fai hi nunphungah neih theih a ni

UDPA bultuma Mizoram pum huapa faina kawnga inelna buatsaih, Mizoram Cleanliness Competition 2021-a ti ṭhate hnenah tun hnai khan lawmman hlan a ni a; Aizawl Municipal Corporation-a Ward XVIII, Saitual, Biate, Laipuitlang Local Council leh Kolasib Ṭumpui VC-te'n lawmman pakhatna an dawng.

Mizoram hi India rama state fai inelnaah kan dinhmun a la ṭha tawk lo hle a, sorkar, khawtlang leh mipuiin ṭan kan la ve viau emaw kan tih hnuah pawh hmasawnna tur kan la ngah hle. Hetih lai hian Mizoram chhunga faina kawnga intihsiaknaah hian a tiṭha ṭhang hi chuan lawmman an la deuh reng a, an nunphungah (lifestyle) fai hi a bet tawh tih a hriat theih.

Ram changkang kan tihte hi ram thianghlim leh fai tak tak an ni deuh zel a, fai hi hmasawnna ken tel pakhat a ni. Hetih lai hian ram pakhat chhunga cheng pawh fai tura ṭan lâk nasatna hmunah chuan fai takin a lo awm theih reng tih a takin a lang zel a, hei vang hian fai hi intihhmuh theih a ni tih a lang.

Kan ram chhunga khúa leh veng ṭhenkhat hi chuan fai hi a takin an nunpui a, naupangte chenin bawlh­hlawh an ngai thei loin fai loh chu thil zahthlakah an ngai hial tawh. Fai hi intihhmuh theih a ni a, nunphungah hman theih a ni. Mizoram hi India rama state fai ber a nih theihna turin veng leh khaw tin i ṭang tlâng ang u.