Doctor-te duh dan leh Mizoram

Mizorama doctor intêl khawmna pawl pahnih, Indian Medical Association (IMA) Mizoram State Branch leh Mizoram Govt. Doctor Asso­ciation (MGDA) hruaitute chuan Mizorama inkhàrkhip mek chu pawhseia kalpui zel ṭha an ti a, "Phai lam aṭangin an rawn haw ṭan a, kan fimkhur zual deuh deuh a ṭul," an ti. 

India ramah Covid-19 a darh zau zel a, hun rei tak chhung he hri a awm mang lohna Hmarchhak state ṭhen­khatte chu tun hnaiah state pawn aṭanga lo hawte'n hri an hawn tel avangin an buai ta hle. Hmarchhak state mi leh sa, hmun dang aṭanga rawn haw zingah positive thar hmuh chhuah tam tak awm mah se, tun thlengin Mizoramah an la awm belh ve lo a, a lawmawm takzet a ni. 

Hetihlai hian Mizo doctor-te chuan kan dinhmun enin inkharkhip neih chhunzawm zel an duh thu an sawi a, hei hi sorkar pawhin bawhzui thei se a lawmawm khawp ang. Inkharkhip kalpui zel dan tur sawiho tura pawl hrang hrang inkoh khawm pawh kha a ṭhat rualin a hre chiang chin (expert) te sawiho hi a ṭhat tawk hmel tho a, vantlang inkhawm tenau buat­saiha pawl hrang hrang aiawhte nena inkharkhip kalpui zel dan tur sawiho kha thil ṭul ber a ni tawh lo mai thei e. 

Kan doctor-te hi he hri chinchang hre ber an ni a, Mizorama inenkawlna kan neih tawk leh kan tlin tawk hre chiang bertu an ni a, anni lamin inkharkhip hi a la ṭha nia an hriat chuan sorkar pawhin an thu hi ngaichang thiam se a lawmawm khawp ang.