CM leh Mizoram thil hman ṭangkai

Mizoram Engineering Service Association (MESA) Golden jubilee lawmna hmanpuitu Mizoram Chief Minister chuan, ram hmasawnna turin ram chhunga awm sate hman thiam a pawimawh thu a sawi a; Mizoramin ṭangkai taka hman theih human resource (mihring), mipui châwm zo khawpa ram zau, sik leh sa nuam, ruahtui ṭha leh thil dangte a nei tih sawiin, "Chung asset-te chu kan ngaih­tuahna leh kan thil thlir dan kan tihdanglam chuan nasa takin hma a sâwnpui theih," a ti a, kawlphetha lamah theihna la hâi chhuah loh a awm thu a sawi.

Kan state hotupa ber hian a hmù dik hle mai a, Mizoram hian a ram chhunga a neih sâ hi din chhuahpui tham a awm ngei niin a lang. Kan rama kan neih sate hmang ṭangkai thiam ila state rethei pawl ni loin tun ai hian hma kan sawn a rinawm bawk. Mihring cheng zat kan ṭhahnem loh tehlul nen kan ei khawp pawh kan thar chhuak lo hi chu kan kalphungah dik tawk lo a awm ngei niin a lang.

Kan sorkarin 'flagship prog­ramme' ti hiala a puan chu mau/ rua a nih thu kan Chief Minister ngei hian a sawi tawh a; nimahsela mau/rua chu a lian thama kalpui an tum dawn ṭan tiha an hmalakna hmasa ber chu state pawn aṭanga mau chi lakluh a ni a, chumi atan chuan pawisa tam tak sen a ni.

Kan ramah a ṭha duh nge duh lo, kan sik leh sâ leh ruah tui tlak dan te, ram san zawng leh boruak nen a inmil nge mil lo pawh hriat loh state pawn aṭanga lakluh mau/ rua chingin kan sorkar chuan flagship programme meuh a kalpui ta a. Heti zat Mau leh rua kan neih sate hman ṭangkai dan dap chhuah hi flag­ship programme hma­lakna hmasaah hman zawk thei se a duhawm ngawt mai.

Kan ram leilung, sik leh sain theihna säng tak a neih thu hi kan ram hruaitute hian kum tam min hrilh tawh a, chu theihna hmang ṭangkai thei tur ber chu kan Chief Minister leh a thawhpuite an ni. Anni lam hian kan rama thil awm sâ hi a taka an hman ṭangkai a hun tawh takzet a; a mihring leh a ramin theihna a neih sanzia inhrilh reng ringawt hi chuan ramin hma a sawn mawh hle tih hi kan kan hmù mêk zel chu a nih hi.