Petrol leh diesel sem rual

Food, Civil Supplies & Consumer Affairs (FCSCA) Department chuan hriattirna chhuahin petrol pump-te'n lirtheia ṭum khata petrol an pek theih zat bituk a tarlang a; hei hi Assam leh Meghalaya chhung hmun ṭhenkhatah tui lian leh leiminin rél kawng leh national highway kawngpuite a tihchhiat avangin ram chhungah tuialhthei châwk luh a khaihlak palh hlauthawnna avanga ruahman a ni.

Petrol a harsa dâwn tih hriat rualin Aizawl khawpuia petrol pump-te chu a lun nghal hle a, thui tak tak an intlar bakah zan lamah an inhawn hun chhung pangngai piah lam thlengin an inhawn a ṭul hial a ni.

Sorkarin mipui tana ṭha tur nia hriaa ruahmanna a siam hi mipui tana harsatna thlentu a ni lehling fo ṭhin a, tuna petrol khuahkhirh a tum rual chiah hian ṭum dang aia tam lei a, mahni lirtheia lêng bâk bura khai haw tur lei an tam nghal hle. Sorkarin insem rual ṭha a ti a, nimahsela mipui lamah duham fal an awm avangin midangte tán harsatna a thlen phah fo a ni.

Hemi piah lamah hian dan loa petrol zuartu lam hian an theih anga tam lâk khawm an lo tum ve bawk nia sawi a awm a, petrol vàn huna man to zawka hralh chingte thlengin an awm ṭhin hi a vanduaithlak hle a ni.

Engpawhnise kan pi leh puten 'sem sem dam dam' an tih nun kha oil a vàn tak tak hi chuan kan hmang hleithei lo chu a ni ber a, kan hman khawp la tura kan ṭuan a rang deuh a nih pawhin midangte an ṭam theihna tura dah ṭhat (stock) tur thlenga duham taka lâk khawm hi ching lo ila, sorkarin petrol insem rual thei ang ber tura ruahmanna a siam hi petrol pump neitu leh mipui lam pawhin i zawm ang u.