Zirlaite hmalam hun

Mizoram Board of School Education (MBSE) chuan tun hnai khan High School Leaving Certificate (HSLC) Examination 2022 result a tichhuak a, zirlai exam 17,417 zinga 12,304 an pass. Pass percentage 70.64% a ni. Kumin HSLC-ah hian nikuma candidate zat 18,012 aiin 595-in an tlêm zawk a, pass percentage 70.64 pawhin nikuma pass percentage 82.43 a phak lo bawk.

Kumina HSLC examination hma­chhawntute hi hri leng kara exam an nih avangin kawng hrang hrangah harsatna an tawk ngei ang tih a rin theih a, mi heti zatin hlawhtlinna an chang hi a lawmawm hle a ni. Hripui kara exam ṭha tak buatsaihtu School Education department lama thawktute leh MBSE lam pawh an fakawm.

Tlemlai deuh kha chuan HSLC hi zirlaite hmalam hun hriltu pawimawh ber ang hiala ngaihna kha a lian hle a, 'matric result a chhuak' tih kha chuan a ram pum hian a ngaihven ṭhin kha a ni a; hun a kal leh deuh hnuah HSLC exam result aiin HSSLC lam kan ngaihven tawlh tawlh niin a lang a, kan hawi lam pawh zawi zawiin a inthlak chho ve zel niin a lang.

Engpawhnise HSLC exam hi exam pawimawh tak a ni a, he result hian zirlaite hmalam hun thui tak hrilin an eizawnna tur lam an hawi ṭanna angin a ngaih theih hial ang. Zirlai ṭhenkhat chuan kaihruaitu ṭha tak neiin an hmalam huna an kal zel dan tur thiam takin an ngaihtuah ang a, zirlai ṭhenkhat tán erawh kaihruaitu neih ṭhat loh chuan thutlukna siam thiam a harsa dâwn hle a, zirlaite hian kaihruaitu ṭha an mamawh hunlai tak a ni awm e.