State pawn rua/mau a la tel

Horticulture department chuan raw chî chi thum - Dendrocalamus Brandisii, Dendrocalamus Sikkemensis leh Dendrocalamus Longispathus supply-tu tur a zawng mek a, raw chi 6,80,200 supply-tu tur zawnna atan tender an chhuah. Tender-te chu May 17, 2022 khan hawn a ni a, a supply tu tur thlanfel a la ni lo.

Raw chi hi Socio Economic Develop­ment Programme (SEDP) hnuaiah 3,00,000, National Bamboo Mission hnuaiah 24,600 leh North Eastern Council hnuaiah 3,55,600 supply tur a ni a, a vaiin 6,80,200 a ni. Heng zingah hian Mizorama tualṭo anga chhiar theih rawmi leh rawnal a tel a, chutihlaiin state pawn lam rua Dendrocalamus Brandisii a tel bawk a ni.

Mizoram sorkar hian rua/mau hi a flagship programme-ah a thlang a, a chi supply tur a thlan hmasak ber tumin kum 2020 khan Dendrocalamus Brandisi leh Dendrocalamus Latiflorus a thlang a, state pawn lam rua ve vein bul a ṭan.

Sawiselna nasa tak a awm hnuah kum 2021-a raw chi supply tur a thlan chuan rawmi (Dendrocalamus Sikkemensis) a thlang ta a, sawiselna thawm pawh a ri vak lo. Tunah hian rawnal (Dendrocalamus Longispathus) chi supply tur a thlang leh ta hi a lawmawm tehlul nen, state pawn rua a tira an supply tir tawh Brandisii chu a la tel ta tho a ni.

Mau/ rua buaipui ber leh tuichilh bera chhal ngam kan Chief Minister hian tun hnaia a thusawinaah hmasawnna atan kan ram chhunga thil awm sate hman ṭangkai a ṭul thu a sawi a. Heti zat mau leh rua chi hrang hrang ṭhahnem tak kan nei chunga state pawn lam rua kan la thlang nawn leh tlat mai hi chu kan Chief Minister thusawi nen pawh a inmil lo hle a ni.