CYMA leh kuhva tawlh ruk

Central YMA chuan dan loa kuhva tawlh ruk chungchangah Chief Minister an kawm a, rawtna hrang hrang an thlen zingah kuhvaa dan ang taka sumdawnna a kal theihna turin chhiah lak (tariff rate) basic custom duty 40% chu 20%-a tihhniam tura hmalak a tel.

Thil awm dan ngun taka thlir hian kuhva tawlh ruk chung changah hian hriatthiam harsa deuh deuh a awm ta nual mai a, a tira khawng taka ṭang Central YMA lam pawh an aw phawi a danglam leh ta deuh. Hetihlai hian CYMA hian a ruka dan loa tawlh an la do reng tih erawh hriat a ṭha a, dan anga ṭha taka lakluh a nih theih dan kawng zawn an duh niin a lang.

Thil hriatthiam ngai tak pakhat awm chu kuhva tawlh hi mi tam tak eizawnna a ni ang bawk hian kuhva chinga rim taka thawka a rah hralha ei zawng hi Mizoramah chhungkaw ṭhahnem tak an awm tih kan hriat reng a ngai. Kolasib leh Mamit District bakah district dangahte pawh kuhva chinga eizawngtu mi ṭhahnem tak an awm.

Tun hnaia Myan­mar aṭanga kuhva tawlh ruk a hluar avang khan Assam chuan Mizorama kuhva thar chhuah a lei hi a kalpui ṭha duh lo a, kuhva chingtute an mangang hman viau a ni.

Engpawhnise sum inrawlh hi a ṭhat­hnem tham avangin kuhva tawlh ruk chungchang hi chu kan la khel zui zel dawn a ni thei a, dan loa lakluh hian nghawng ṭha lo tak a neih mek avangin hei hi chu tihtawp a nih theihna turin Central YMA pawh an ṭan lehzual a ngai ang.