Negative fiahna atana RAT hman tihtawp ni rawh se

Tun hnaia Police Training School (PTS) mitthi chu Rapid Antigen Test (RAT) hmanga endiknaah Covid-19 a negative tawh avangin Covid Care Centre (CCC) aṭanga chhuahtir a ni a; nimahsela a chhuah tûk lawkah a thih tak avangin a thih hnuah TrueNAT-PCR hmangin a swab sample endik nawn a ni a, Covid-19 a la vei tih hmuh a ni.

Hri hlauhawm tak, kan la hmelhriat ngai loh kan hmachhawn meka, sorkar tan pawh rel dik vek theih a ni lo; tihdik sen pawh a ni lo. Covid-19 vei leh vei lo enfiah dante pawh a dang chho zel a, a vei tawh sa an chhuahtir dan hi India ram chhungah ngei pawh a inang vek thei lo. Mizoram hi Covid-19 dona leh hri veite a enkawl kawngah a tiṭha pawl tak ni mah ila, tihsual leh tihfuh tawk loh a nei ve fo mai. 

Tun hnaia vanduaina thleng hi sorkar thiam loh anga puh duhtu tan chuan puh theih ni tho mah se, a endikna khawl ber (RAT) in negative tawha a puan miau avangin CCC aṭanga an chhuahtir hi an tih tur dik tak a ni. Vanduaithlak takin CCC a chhuahsan hnu lawkah a thi a, a thih chhan chu mipui hriat ni ve lo mah se, a thih hnua an test nawn lehnaaa  lo la positive tlat mai hian a hma aṭanga rin loh hlawh tawh sa RAT rinhlelhna a tizual lo thei lo a ni. 

RTPCR ngei pawh hi 100%-a rintlak a ni lo an ti lehzel a, hri vei hmuh fuh loh palh leh negative tawh pawh la positive anga hmuh a nei ṭhin niin mithiamte'n an sawi a; chuti chung chung chuan a rintlak ber leh dik (accurate) ber anga an ngaih chu RTPCR hi a ni. Hei vang tak hian sorkar pawhin RTPCR hi a ṭul a nih chuan lei belh se, laboratory-te pawh siam harsa tak anga an sawi kha an sawi ang em emin a harsa lo tih hriat a ni tawh. 

Kan sorkarin sum a neih loh chu tlang hriat a ni a; nimah­sela Covid-19 positive tih finfiah tawh chin tal hi chu an chhuah dawnah RT-PCR a nih loh pawhin TrueNAT talin endik tawh ṭhin se. Positive an ni tih finfiahna atana hman tlak RAT hi negative fiahna atan chuan a rintlak tawk lo tih chiang takin a lang tawh. A man a tlawm zawk avanga positive tawhte an negative leh negative loh RAT hmanga endik hi chu tihtawp ni se, sorkar hian pawisa a nei ngang lo a nih chuan positive-te RTPCR hmanga endik nawnna tur sum na na na hi chu mipui pawhin an thawh khawm hreh hauh lo ang.