MGNREGS leh Covid-19

All Mizoram Village Council Association (AMVCA) hruaitute chuan, thingtlang lama Covid-19 dona leh invênna kalpui meka rawtna an neih te, thingtlang lam economy chawikân dan tur leh MGNREGS ṭangkai lehzuala kalpui dan tura rawtna an neihte chief minister hnenah tun hnai khan an thlen.

Khawpui leh thing­tlang nun a danglam angin a enkawl danah pawh kaihhruaina a inang lo a, hmasawnna hna chhawp chhuah hrang hrangte leh nitin khawsak mamawh thila kan dan neihte pawh a inang lo hlawm. Hei vang hian Covid-19 dona leh invenna kalpui mekah pawh hian khawpui leh thingtlang tana inkaihhruaina hranpa siam hi thil finthlak tak a nih hmel.

Tun hnaia Mizoram pum huap VC aiawhte'n rawtna hrang hrang an neih zinga a ki pui pakhat chu MGNREGS hman ṭangkai dan hi a ni awm e. India ram puma kalpui mek MGNREGS hian inkaihhruaina fel fai tak a nei sa thlap a, a hman theihna leh hman theih lohnate pawh ziaka dah vek a ni. Hetihlai hian a awmna hmun mila a ṭul anga her remte pawh a ni ṭhin bawk. VC lamin an ngaimawh - MGNREGS material component sum chu mimal hna inpea party worker invulhna anga kalpui hi a awm tak tak a nih ngai chuan thil zahthlak tak a nih piah lamah thil pawi tak a ni a, dan kalh a ni a, tihtawp vat tur a ni. 

Thingtlang mite inkhai chhuahna tur hmanraw pawimawh ber zinga mi, an ei tur an thawh chhuah theihna remchang pawh party bil induh­sakna atana tun ang huna hmang duh an awm a nih chuan thil zahthlak tawpkhawk a tling a; hri leng avanga harsatna kan tawh mek avangin miin thilphal takin a nei lo zawk leh harsa zawkte mahni sum senga an puih lai a, party induhsakna atana MGNREGS lo hmang an awm a nih chuan a fel lo hle a ni. 

Hetiang thil chhui chhuak a, chingfel theitu chu sorkar a ni a, Covid-19 lenlaia party mite duhsakna atana MGNREGS hmangtu hi chhui chhuah ngei ni rawh se.