Sorkar sum leh sorkar hnathawkte thil phût

Mizorama sorkar hnathawk inzawm khawm pawl lian ber, Federation of Mizoram Government Employees & Workers (FMGEW) chuan sorkar laipuia hnathawkte dearness allowance (DA) ang lak ve an phût a, sorkar hnathawk pension kum 62-a tihsan an phût bawk.

FMGEW thil phûtte hi an thlirna aṭang chuan thil âwm tak a ni ngei ang a, sorkar laipui hnuaia hnathawkte an phak lohna a san avangin state sorkar lakah an pangchang hi thil mak a ni lo.

Hetihlai hian hman ni lawk thlenga a hun taka hlawh pawh la thei lo an nih avangin sorkar tan chuan sorkar hnathawka an insen belh tur hi a tam dawn hle a, a luhaithlak viau ang.

Sorkarin hna ruak a hnawh khat zung zung thei lo a, chumi tur chuan sum a neih loh vang a ni ber. Chumi remchanga laa pension hun kum 62-a tihsan pawh hi an thlirna zawn aṭang chuan a ṭha viau ang tih a rin theih a; amaherawhchu ṭhalai hna zawng rual tan chuan hei hi thil lawmawm ber a ni kher lo ang.

Engpawhnise kan ram sorkar kalphungah hian sorkar hnathawkin an zuam tur leh an nawr kal theih turin an lo awm tawh ṭhin a, inthlan dawna an intiamna vangte pawhin a ni ang, sorkar hi a tawlh leh mai ṭhin.

Kan state sorkar hian a hnathawkte duhsak thei tur khawpin sum chu nei se duhsak hi a ṭha a, chutih rual chuan state sorkar sum neih loh kara hetiang rawtna awm hian sorkar lu a tihai hle ngei ang.