Petrol vâng leh a sem rual hna

Tun hnaiah Assam-a rel kawng a chhiat avangin Mizoramah petrol a vâng hle mai a, sorkarin a lak theih zat a khuahkhirh a, mipuiin an insem zai theihna turin ruahmanna a siam. Hetihlai hian hmun hrang hrangah a man sang takin petrol hi dan loin (black) an zuar a ni.

Mipui mamawh a nih avang hian sorkar pawhin insem­zai a ṭha tih hriain ruahmanna a siam a. Harsatna awm thei hi hmu lawkin hma takin a inruahman ve a; nimahsela filling station ṭhenkhatah a sem chhuah danah thil fuh tawk lo a awm a ni thei a, oil phurtu driver lam zawkin emaw an lo chheprelh pawh a ni ve thei; tunlai hian black-a petrol lei tur a la awm reng a ni.

Mipui an mangang tawh a, loh theih loha chhuah ṭulnaah pawh kal hleithei tawh lo an awmlaia petrol black-a zawrh tur khawp a la awm a nih chuan a sem rual dan tura ruahmanna siam zawm lo an awm tihna a ni. Hetiang hunah tak hian sorkar hi a khauh ngam a ngai a, rua­hmanna a siam chin bak chu pek chhuah loh ni se a lawmawm hle ang.

A mipui lam pawh­in oil harsat lai hi chuan danin lak min phalsak aia tam lak ṭalh tum bik lo ila. Lo chheprelh leh a tam thama lo neih (stock) fal bik tum lo bawk ila, kan mamawhna a san tlan avangin Mizo takin i insem dial dial ang u.