Health Care-ah sorkarin mipui pawisa Cheng vaibelchhe 68 a la pe chhuak lo

Mizoram State Health Care Scheme (MSHCS) hnuaia damlo inenkawlna senso Rs 68,63,52,238 chu pek chhuah a la ni lo. RTI Act hmanga zawhna chhannaa a lan danin MSHCS hian April, 2021 thleng bill a pe tawh a, he mi hnuah hian bill pek loh 25,765 a awm a ni.

Mizoram sorkar hian hei hi a ngaih pawimawh a ṭul hle mai a, sorkar sum neih loh chhuan­lama hman rengna chi a ni lo ang.

MSHCS-ah hian mipuite hi anmahni pek tur zat bithliah pe fel thlapin an inziak lut a, sum ṭhahnem tham tak hi mipui sum tling khawm sa a awm a, a bak hi chu sorkarin a pek ve tur a ni a, heti zat zat leiba awm hi a fel lo hle a ni.

Mipui sum pangngai pawh ni lo, damlo mangangte inenkawlna sum heti zat zet sorkarin a batsak hi thil fuh lo tak a ni a, India ram hmun danga thil thleng ni se mipui lungawi lo thawm pawh a ring hle tawhin a rin theih. Sorkar hian MSHCS-a bill tang hi a ngaihven ran a ngai a, sorkar sum inpawh pawlh theih loh chhuanlama hmanga thil danga sum hman tur nei reng sia damlo inenkawlna bill em pawh pek chhuah theih loh hi chu ngaihtuah chian a ṭha khawp mai.

Sorkar sum har­satna hi mipui hian an hrethiam thui hle a, an hriatthiam theih loh ṭhin erawh chu a sum hmanna ṭhenkhat thil ṭul leh hmanhmawhthlak nia lang si lote hi a ni a; damlo inenkawlna sum cheng vaibelchhe 68 zet batsak hi sorkar hian ngaimawhin ngai pawimawh rawh se.