Kuhva chingtu versus kuhva tawlhtu

Hachhek Bial Kuhva Chingtu Pawl (HBKCP) chuan Myanmar aṭanga kuhva rah lakluhin an kuhva thar hralhna kawngah harsatna nasa tak a siam tih an sawi a, hemi kawngah hian Central YMA nen inkawm an duh. HBKCP hian kum 2021-22 chhungin an kuhva thar aṭangin Rs 27,41,20,150 an hmu chhuak a, hetah hian khaw pali thar chhuah zat an la belh tel lo.

Tunlaia Mizo­rama titi lian tak chu Myanmar aṭanga kuhva rah dan loa lakluha hralh chung chang hi a ni a, hei hi kawng hrang hrang aṭangin thlir a ni a, sawiseltu an awm rualin a hlawkna teltu lam erawh chuan a pawi loh dante pawh an sawi.

Sorkar leh ram dan phal loha smuggling a nih avang ringawt pawh hian tihtawp a ṭul tehlul nen, kan ram chhunga kuthnathawktute buaina thlentu a ni tih a chian hnu phei hi chuan kuhva rah tawlh luh hi chu sawi mawi tawh loh a ṭha hle mai.

Dan anga lakluh theih a ni reng a, chutihlaiin dan anga lakluh a nih dawn chuan chhiah pek tur a sang hle. Sorkar laipui lamin chhiah an tihsan chhan hi India ram chhunga kuhva chingtu kuthnathawktute hamṭhatna an duh vang a ni a, chutih­laia kuhva rah tawlha sumdawng tute emaw vanga kan kuthnathawktute tawrh theihna thilah rawtna eng eng emaw a awm ṭan niin a lang a, ngaihtuah ngun a ngai hle.

Kan rama chhungkaw ṭhahnem takin eizawnna bul bera an neih, rim tak leh hah taka an buaipui kuhva hi Myanmar kal tlanga tawlh luttute sumdawnna vanga kuthnathawktu lamin an tuar a nih chuan sorkar thiam loh a ni thui hle awm e.