Kawngpui laihna leivung

Mizoram Pollution Control Board (MPCB) chuan tun hnai khan national high­way enkawltu National Highways and Infrastructure Development Corporation Limited (NHIDCL) chu kawngpui an laihna leivungin lui a tihbawlhhlawh nasat avanga insawifiah tura hriat­tirna, show cause notice a pe a, ni sarih chhunga insawifiah turin a hriattir.

Tunlai hian Mizo­ram kawngpui hi hmun tinah an zauh a ni ber mai a, NHIDCL hmalakna hian khaw chhak tawpah te, chhim thlang lamahte leh chhim tawp thlengin kawng zauh hna an kalpui mêk. Kawngpui zauh hna hian a ken tel chu leivung paih a ni a, ṭha taka paih a nih loh avang leh, viltu nei lo ang maia an duhna remchang apiangah an paih avangin tunah hian harsatna kan tawk ta mêk a ni.

Lui lian fintu lui te tam tak chu luang hleithei lo khawpin a tibuai a, kawr te tam tak chu khuh bo a ni. Luiin an kuang an sawn a, a tawpa tuartu chu luia nungchate an ni a, hei bakah hian kan environment nasa taka tihdanglam leh tihchereu a ni ta mêk a ni.

Dem tur zawn dâwn chuan zawn hmuh tur an tam thei ang a, a pawimawh ta ber chu engtin nge a siam ṭhat hna kan thawh leh theih ang, tih hi a ni awm e.

Leivung paih tawh sate hi rût leh tur chuan thil tih rual a ni lo a, chutih rualin an paih leh tur erawh ṭha taka vil leh ven theih a ni. He hna hi tunge thawk dâwn a, tuin nge vil zui ang?

Tunah hi chuan kawngpui laitute hian an duhna apiangah awlsam takin leivung hi an nawr liam a ni ber a, mahni ram pawh humhalh nachang kan hriat loh chuan kan tuar zel dâwn tihna a ni mai a, sorkar leh khawtlang ṭangrualin leivung paih tur hi kan ven rawn a ngai ta a ni.