Traffic jam tihziaawmna tur PAHOSS

Mizoram sorkar chuan khawpuia lirthei dahna Parking House Support Scheme (PAHOSS) hnuaiah cheng nuai 1,132.30 a pe chhuak tawh a, chutih laiin, PAHOSS dawng tura thlan tawhte hnena la pek loh cheng nuai 4,987 a awm bawk.

RTI Act hmanga zawhna chhannaah PAHOSS hi traffic jam sutkianna tura siam a nih angin, PAHOSS hnuaia parking house sa zo tawhte awmnaah chuan traffic jam a tiziaawm, tiin UDPA department lam chuan an chhang.

PAHOSS hi rawtna ṭha tak a nih rualin a rawt chhuah chhan 'traffic jam sutkianna' tih hi chu a hlawhtling tawk lo ang tih a hlauhawm a, a sum hman tam dan leh a ṭangkaina han teh hian sorkar hian ngaihtuahna a sen nawn leh a ṭha khawp mai.

Mizoram sorkar sum neih loh dan leh thil danga kan inhrek dan aṭanga teh chuan sum hmanna tur ṭha leh ṭangkai zawk pawh a awm thei a, lirthei dahna tur siamna atan ringawta kan sum hman zat leh kan sorkar sum bawm hi a inmil zan lo niin a lang.

PAHOSS kalpui tawhnaa traffic jam a ziaawm deuh anga sorkar lamin an hmù thei mai hi mipuiin an pawmpui lo mai thei a, sorkarin pawisa a neih lohzia a sawi ṭhin leh lirthei hunna tur siamna atana a pawisa hman zat hi en mil thiam a harsa a, traffic jam sutkianna tur a nih phei chuan a tum a ṭhelh ang tih hlauhawm tak a ni.