Grape wine leh Mizoram sorkar
Excise & Narcotics department chuan tun hnai khan sorkar thuneitu sang aṭanga thu an hmuh bawhzuiin Aizawla grape wine zawrhna hrang hrang an dap a, Mizoram siam grape wine tam tham tak an man.
Mizoram sorkarin tun hnaia wine a mante hi Mizoram chhunga siam a ni a, a ruk a rala zawrh ni loin a zawrhna dawr hranpa siama ualau taka an zawrh a ni. Sorkar lam chuan Mizoramah zu khap burna dan hman a nih leh tak avangin grape wine zawrh chu dan phal loh a ni tiin an mansak tih an sawi.
Tunah hian Champhai district lamah chuan winery lian tham takah grape wine hi siam mek a ni a, tun thleng hi chuan tihtawp a la ni lo a, chutihlaia an siam chhuah sa an lo man leh si hi thil mak tak a ni. MNF party ngei hian kum 2018 inthlan dawna an manifesto-ah pawh, 'Grape chingtuten hlawk zawk leh mumal zawka an hralh theih nan sorkarin a buaipui ang," tih an ziak lang a; 'Family oriented SEDP hnuaia trade thlan theihte' tih hnuaiah pawh 'Grape' tih chu 'thei chin theihte' tih hnuaiah ziah lan a ni.
Tunah hian grape chintirtu leh grape wine aṭanga kuthnathawktute intodelhtir tumtu sorkar bawkin an thar chhuah a mansak a; SEDP-a kuhva ṭiak semtute sorkarna hnuaiah Myanmar aṭangin dan loa hlawm lian taka kuhva tawlhrukin kuthnathawktute kuhva thar hralhna a tibuai mek bawk.
Mizoram sorkar hian grape wine hi a khap a nih chuan winery neitute pawh huaisen takin hmaichhanah hrilh chiang se, an grape chinna hmunah kal chilhin a thlakna tur eizawnna dang rintlak pe ngei bawk se. Tuna grape wine siam chhuah sa khawpuia lo man sak ringawt hi chu a tlanchhe zia bakah a ngaihtuah thui loh thlak deuh lo maw?