Ruihhlo do beihpui thlak a ngai

State Level Core Committee on Ruihhlo Do chu tun hnai khan Chief Minister hoin an ṭhukhawm a, he committee-ah hian Mizoram sorkara mi pawimawhte bakah tlawmngai pawl hrang hrang aiawh an tel a; ruihhlo (drugs/ psychoactive substance) bakah zu do tel ni se, tih an rel a. 'Ruihhlo Do Awareness Cam­paign' kalpui ṭha an ti tlang a, kohhran leh tlawmngai pawlte hmalakna tichak lehzual turin School Education hnuaia zirna in zawng zawngah awareness programme kalpui ni se an ti.

Tunlai hian Mizo­ramah ruihhlo chi hrang hrang a hluar hle a, media ṭhenkhat report-a a lan dan chuan tun lai hi Heroin no. 4 pawh a tlawmlai niin awlsam taka lei theihin a awm reng a ni. Ruihlo hian min ei chhe nasa tawh tih kan hre tlang a, tunah a hluar a nih chuan ṭhangthar naupang zawkte a bei chho leh mek tihna a ni a, a pawi takzet a ni.

Hei hi sorkar chauhin do hneh chi a ni lo a, tlawmngai pawlte leh kohhran nena an thawkho hi thil lawmawm tak a ni. Hetihlai hian sorkar hian ruihhlo do kawngah hian tlawmngai pawl leh kohhran hi rinrawlah a nei mai palh ang tih erawh a hlauhawm a, awareness campaign kalpui chungchangah pawh a hranpain sorkar lamin chak takin ke a pen a ngai a, ruihhlo do rem tura tun aia nasa zawka a beih a ngai bawk a ni.

Core committee ṭhukhawmin ruihhlo bakah zu do tura a rel thar leh hnuhnawh te hi thil mak angreng tak a ni. Zu khap burna dan hman a nih tawh laia a hrana zu do tur thu rel a ni leh hian zu a zalenin awlsam takin a hmuh theih tih a nemnghet tel a, sorkar tan chuan mualphona a tling hial ang.

Kan ram dinhmun hi a him lo a, ruihhlo do hi a taka kalpui tur chuan sorkar aṭanga tih takzetna (political will) neih a ngai a, tun ang leka ruihhlo do hi chu awmzia a nei thui lo tih a takin kan hmu mek a ni.