Chief Secretary atan Mizo?

Central YMA, MUP, MHIP, MZP leh MSU-te telna, NGO Coordination Committee chuan Mizoram Chief Secretary atana Mizo dah tura an ngenna sorkar laipuiin a tihhlawhtlin loh avangin Chief Secretary pisa kai tur dan an tum a, Chief Secretary hi pisa kai a tum loh avangin an ṭhulh leh a ni.

NGO hruaitute chuan Chief Secretary atana tling Mizo an awm chhung chu Mizo ngei dah an duh thu thuneitute hnen­ah an thlen tawh thu leh, an ngennain ngaih pawimawh a hlawh loh avanga an lungawi loh thu an sawi chhuak a. Chief Secretary pisa kai tur dan hi 'thiam chin awm lo' a nih thu an sawi.

Mizoram Chief Secretary hi hnam dang ni mah se Mizoram tana ṭhahnemngai taka thawktu niin a lang a, sum leh paia eirukna kawngah a hmingchhiat sawi tur a awm lo. Hna a thawh ṭhat loh leh sorkar tan pawha thawhpui a harsat thu emaw, Mizo hnam tana a hnawksak thu emaw pawh sawi a awm lem lo; chutihlaia 'hnam dang' a nih vanga thlak tumna awm ringawt mai hi thutlukna fing ber a ni lem lo ang.

Duhthusamah chuan Mizo ngei hi Chief Secretary nei thei zel ila a duhawm a, chutihlaiin Mizo ni lo an awm avanga har­satna lian tham thleng emaw, a state leh hnam tana thil pawi a thleng a nih lem loh chuan Mizo an nih loh vanga hnawl tumna awm hi kan ram leh hnam kal zelna atan thil ṭha ber a ni lo thei - ngun zawka ngaihtuah nawn a ṭha khawp mai.

'Pawl kal khawm' kan nih tawh hi chuan rum tak taka thu rel mai te a awl a, ngaihtuahna fim hman loh palh pawh a awm thei. Chief Secretary pisa kai tur dan tumna awm hi chu NGO hruaitu lam hian ngaihtuah nawn leh thei se a ṭha hle.

Mi ṭha lo chu eng hnam pawh ni se kan hnawl ngam a hun a, mi ṭha chu a hnam avanga thlir tur a ni lo ang. Kan Chief Secretary neih mek hi hnathawha a ṭhat lohna langsar hriat a ni lo a, 'Mizo a ni lo' tih ringawt hi a tehna atana kan hman chuan nakin zelah keimahni tan a ṭha ber lo thei a, ngaihtuahna fim zawk nen ngaihtuah nawn leh thei se a ṭha ngawt mai.