MP hmachhawp hlawhtling se

Rajya Sabha MP K Vanlalvena chuan tun hnai khan MJA Gen. Hqrs hruaitute a kâwm a, Mizoram hmasawnna turin project thar bawhzui tur eng emaw zat a neih zingah ramhmul damdawi sawngbàwlna Mizorama din chungchang te, environment tichhe si loa eizawnna leh hmasawnna hna thawh chungchang te, hlâwk tak tak tham tura khuai khawi chungchang te, Mizorama luite ṭangkai lehzuala hman a nih theih nan chhim lama leilet tam zawk siam leh lawng hman ṭangkai chungchangte a tel thu a sawi. 

Rajya Sabha MP hian hun rei lo te a hman chhungin Mizoram tan thil ṭha tam tak tih a tum tih a lang tawh a, sorkar laipuia mi pawimawhte pawh a hmu nual tawh a, ram mamawh thil a thlen chungchangte pawh media lamah hmuh a ni. Hetianga ram tana inpe, hmasawnna thlentir tak tak tum MP kan nei hi a lawmawm hle. 

Chutih rualin thil hi a taka thlentir tur chuan a awlsam lo a, heng a tih tur nia a sawite hi bawhzui tur chuan hun a duh dawn a, a tak ram thleng tur phei chuan hun a duh rei lehzual ang. Tunah chuan media hmaah a kâ a âng tawh a, Mizoram mipui hriat turin a ṭawng chhuak tawh a, thil tih tum a neihte hi a taka tihlawhtling ngei tura ṭan a lak a ngai ta a ni. 

Kan sorkar hotu ṭhenkhat hian thil ṭha tak tak nia lang an sawi liam puat a, mipuite beiseina sang tak an siam zet hnuah a tak ram thlentir leh si loin an zuih ral fo a ni. Sorkar laipuia mamawh thlen leh sorkar laipui aṭanga a taka hnathawk thei tura thil sawi chhuah hi a inang lo a, hei vang tak hian kan Rajya Sabha MP pawh hian ṭan a lak zual a ngai dawn a, a thu thlen ṭha taka lo dawngsawngtute hi a tak taka thlentir ngei tura a nawr chak deuh pawh a ṭul ang.

Hun rei lo te chhunga Rajya Sabha MP hmachhawp neih chin ringawt pawh hi a lawmawm a, hmalakna dang neih belh miah tawh lo pawh ni se tuna a hmachhawpte hi a taka a thlentir theih chuan MP fakawm tak a ni dawn. Tuna a sawi chhuah chin tal hi a hlawhtlin theihna turin tha thlah loin kan MP hian hna thawk zel thei se a lawmawm dawn hle a ni.