Grape wine siam leh zawrhah sorkarin dan an tidanglam dawn em?

Champhai Grape Growers’ Society (CGGS) leh Hnahlan Grape Growers and Processing Cooperative Society (HGGPCS) te chuan grape wine man a nih chungchangah a tawp thlenga ṭan an tum thu an sawi nawn a, sorkar aṭangin official-a thu dawn la nei lo mah se an bialtu MLA-te'n sawihopuia theihtawp chhuah­pui an inhuam thu an sawi avangin an bialtu MLA-te an la ngaihchan thu an sawi.

Excise Minister chuan dan kalha zawrh a nih angin grape wine-te an man tih a sawi a, Mizoram Liquor Prohibition Act, 2019 chuan Mizoram chhunga grape wine siam hi a khap a, a zawrh pawh phal a ni lo. Minister sawi ang hian he dan hi siam ṭhat a nih miau loh chuan dan bawhchhiaa thil kalpui a ni a, man theih an ni reng a ni.

Hetihlai hian grape chinna lam khuaa an bialtu MLA-te chuan grape chingtute titipui an tum a, theihtawp chhuahpui an inhuam thute pawh an lo han hrilh tawh. Hei hi thu lawmawm tak a nih rualin sorkar hian a dan siam tawh hi a tidanglam a nih loh chuan thil kalpui tak tak a harsat hmel a, 'inhriatthiam tawnna' tia kal hi thil fel ber a ni lo ang.

Sorkar hian MLP Act anga grape wine hi a khap a nih chuan 'inhriatthiam' ringawt hi chu thil fuh lo a ni a, "Hei, kan khap reng alawm," tia a dana khap si a, a lehlama mipui tihlawmna tura a siam leh zawrh phalsak tho si hi chu sorkar hian hre rengin ama dan siam a bawhchhhia tihna a ni dawn a; sorkar hian grape wine hi siam leh zawrh a phalsak dawn a nih rau rau chuan huaisen takin a dan zawk hi tidanglam ngam se a ṭha hle ang.