Mizoram leh hausakna

Chief Minister chuan Mizoramah sum hailuhna tur thil tam tak a awm thu sawiin, "Millionaire nih ṭeuh theihna kan ramah Lalpa'n a dah. A tam lutuk malsawmna min pek hi, tlang ram nei lo ram lum em emte'n an awt hle. Kan lak chhuah a, a petu tum dan anga hman hi kan bat ve a ni. Kan hmaa chona awm hi ngaihtuahna thar nen i thlir ang u," a ti.

Kan rama thlai leh thei a ṭhat duh thu te, thing leh mau kan ngahzia te, hausakna hai chhuah tur a tam thute hi uar takin kan sawi ṭhin a, oil lipui chunga awm ang mai kan nih thute thlengin kan in hrilh ṭhin. Kan ram hausakzia min hrilh ṭhintute hian hausakna chu min la hai chhuahpui hleithei lo a ni. India rama state thawh chhuah nei tlem leh a rethei pawl kan la ni reng mai hi chu a buaithlak ngawt mai.

Kan ram hruaitute leh a enkawltu ber, kan sum bawm chabi kawltu leh a pawisa hman tur bithliahtute hian kan ram ṭhatzia hi min hrilh reng mah se a takah kan rethei si a, thingtlang mai ni lo khawpuiah pawh mirethei an pung zel emaw tih turin kan awm si a, kan ram hausakna chanchin inhrilh ringawt hi chu kan dampui ta lo deuh a ni.

Kan Chief Minis­ter hian ṭha­hnemngai takin kan ram ṭhatzia hi a sawi ṭhin a, a takin a hmu chiang hle ni pawhin a lang a; nimahsela chu ram ṭhaa hausakna hai chhuak tur chuan a taka thawh a ngai a, tun thleng hi chuan state hausa pawl nih kan la hlat deuh a, ṭan lak a ngai khawp mai.