Kuhva chingtute harsatna

Hachhek Bial Kuhva Chingtu Pawl (HBKCP) hruaitute leh Central YMA hruaitute chu tun hnai khan an inkawm a. CYMA-in Chief Minister hnena lehkha an thehluh tawh, Myanmar aṭanga kuhva rah lak luhah chhiah tihhniam an rawtna chu hnûk kîr turin HBKCP chuan an ngen a, an ngenna chu CYMA hian an tihhlawhtlinsak thei dâwn niin a lang. CYMA hruaitute chuan, a theih chin chinah kuhva chíngtute harsatna chu HBKCP-te nen ṭang tlangin sorkar thuneitute hnenah thlen ṭhin an rel.

HBKCP chuan, Mizoram khaw thlang lama kuhva chíngtute harsatna tawh mek chu a rang thei ang bera sutkiansak turin Mizoram sorkar an ngen takmeuh tih an sawi a; sorkar aṭanga ṭhu lawmawm an hriat lawk loh chuan India President hnenah an harsatnate thlen mai an tum thu an sawi.

CYMA lamin puitling taka an hmalak tawhna ennawn an remti a, Mizorama kuthnathawktute tana hamṭhatna awm thei zawnga thil an kalpui dâwn ta hi thil lawmawm tak a ni. Kuhva chingtute tana harsatna thlen khawpa dan loa kuhva smuggling kal hi a ngaimawhawm a, he mi tireh tur hian CYMA hian theihtawp chhuahin thlawp zel se a lawmawm ngawt ang.

HBKCP-in an har­satna tawh mêk su kiang tura Mizoram sorkar an ngenna hi sorkar lamin ngai pawimawh thei se, an kuhva tharte hralh harsa khawpa khaw chhak aṭanga kuhva a lo lut hi tihtawp a ṭha khawp mai. Chuti loa HBKCP lamin India President-ah an thlen a nih chuan Mizoram sorkar tán mualphona a ni dâwn a, keimahni leh keimahni kan inhek lohna turin Mizoram sorkar hian hma la vat thei se a lawmawm ang.