State dangte entawn tur hmasawnna

Tripura-a Zo Kutpui hmannaa thusawitu Mizoram chief minister chuan, "Remna hi Mizoram hmasawn theih chhan pawimawh tak a ni. Remna sual chhuak tawh state kan ni a, remnain hmasawnna a thlen dan kan hria. Kan chhehvel state leh ṭhenawm rama remna siam turin Mizoram min mamawh a, heng zawng zawng hi mi­mal emaw pawl pa­khat avang chauh ni loin, Pathian kaih­hruaina vang vek a ni," a ti. 

Mizoram sorkar Tourism department chuan thawhpui tur sawmin Mizoram pawn Vanghmunah Zo Kutpui a buatsaih a, Zofate chenna hmun dangahte pawh buatsaih zel an la tum. Zofate hi chhan hrang hrang avanga ṭhen darhin awm mah ila, kan chenna hmun ṭheuhah Mizo kan nihna vawng nung rengin Zofate tan hmasawnna hna kan thawk tlang zel a, a lawmawm hle a ni. Kan chief minister sawi ang hian Mizoramin 1986-ah remna leh muanna a nei a, he mi hnu hi chuan India rama state ralmuang ber zinga mi kan ni chho ta zel a ni. Mizoram pawhin kawng hrang hrangah hma a sawn chho ve zel a; nimahsela lan hmasawn dan hi ngun taka kan thlir ngam chuan lungawi a la har hle. 

Indi ram state lian leh sum thawk chhuak tamte kan el phak lo a nih pawhin India Hmar Chhaka kan ṭhenawm state-te tana entawntlak tal hi ni thei ila a duhawm a; nimahsela ram buai leh hel vanga harsatna tawk reng mai state-te pawh tluk mang loa kan awm hi chu lung­awi a harsa ngawt mai. 

Kan remna leh muan­na neihte hi silai ri reh taah ringawt hian tawp mai lo se, a taka hmasawnna thlentu lo ni se, India Hmar Chhak state dangte entawn tur tal hian hmasawnna kawngah ṭhang thei ila a lawmawm ngawt ang. Kum 30 chuang kal ta khan remna kan nei tawh a, tun thlenga remna leh muanna nei ve lo state-te nena hmasawnna kawnga danglamna awm mang lo, kawng tam takah phei chuan hnufual zawk kan la ni reng mai hi a zialo hle. Kan remna leh muanna hian state dang entawntlak hmasawnna hring chhuak tawh ngei rawh se.