Tunge mi hminga compensation dawn tum?

BJP Mizoram president chuan Mizorama Minister leh MLA zingah mahni hminga zangnadawmna la ngam lo, mi hming hawha zangnadawmna lak ṭeuh tum an awm thu a sawi a, central Minister pakhat pawhin Mizoram sorkar chu kawng ṭha aia compensation duh zawkah a puh tiin a sawi chhuak.

Tun hma pawhin compensation sem a nih hian thil fel lo a awm niin sawi ṭhin a ni a; nimahsela a duh leh ngamte hi chuan a pawisa ber hi chu an la hman zel tho a, sawiselna awm bawk mah se hmingchhiat pawh pawi ti loin pawisa hi an ûm zawk ṭhin a ni ber mai.

Tun hnaiah Mizoram hmun hrang hrangah kawngpui laih a ni a, kawngpuiin a sut tlang a khaw mipuite'n an phu ang taka zangnadawmna an dawng hi an lawmpuiawm a; nimahsela he mi kara remchang zawnga zangnadawmna ita ram lei chhawng a, mi ram hmanga sum siam ching mimal leh sorkar official ṭhenkhat an awm hi a vanduaithlak hle.

Chumi piah lamah poli­tician zingah hetiang sum ita zangnadawmna hmuh tuma midang hming hmang an awm a nih chuan an demawm takzet a ni. BJP President thil sawi hi a dik a nih ngai chuan a hming hmerha sawi chhuah hial pawh a ṭha hle ang. Tun hnaia Vairengte aṭanga kawngpui siam tura zangnadawmna lak turah pawh sawi neuh neuh a tam a, a hre chiang tur sorkar official-te pawh an awm ngei ang a, hei hi thil serious tak a ni.

Minister leh MLA zingah mi hminga zangnadawmna lak tum an lo awm a nih ngai chuan an hming puanzar ngam a ṭha khawp mai.