Sorkar-in grape wine siam leh zawrh a phal nge phal lo?

Tun hnaiah Millennium Centre leh hmun ṭhenkhata grape wine zawrhte chu Excise & Narcotics department lamin an man. He mi thu kal zelah hian Excise minister chuan grape wine hi man an tum ber a nih loh thu leh, ram dang siam wine leh zu zawrhte man an tum thu a sawi a, hetihlai hian Millennium Centre-a grape wine zuarte chuan an kut aṭanga zu an man loh thu an sawi ve thung.

Champhai Dis­trict NGO Coor­dination Committee chuan thu chhuah siamin tun hnaia grape wine man a ni chu Champhai leh khaw chhak tlangdungte hmuhsitnaa an ngaih thu an puang a, sorkar chu grape wine khap loa grape chingtute chu hlawkna an neihna tura kawng zawnpui turin an phût lêt a ni.

Tun hnaia inhnialna lian tak chu grape wine chungchang a ni a, Mizoram sorkarin zu khap burna dan a siamah grape wine siam leh zawrh hi khap tel a ni. Chuti chung chuan 'inhriatthiamna' tiin grape wine hi an siam reng a, ualau takin an zuar reng bawk a, tun hnaiah a hlawma mansak an nih tak avangin boruak hi a alh thar ta hluai a ni.

Mizoram sorkar hian grape wine siam leh zawrh hi a phal lo tak tak a nih chuan 'inhriat­thiamna' ti kual lo hian khap zingah telh lo (exempt) ngam mai se a ṭhat zawk hmel a, mahni dan siam bawhchhiat ringawt hi a fel ber lo.

Tunah hian grape wine khap ti siin an mante pawh 'man palh' anga chhuah a, a lehlama 'khap' zinga telh leh tho hi a kalphung a mumal lo viau a, sorkar hian a dinna lam tichiang ngam se a ṭha ngawt mai.