Zirlai pawlte thil vei

Mizo Zirlai Pawl chuan thuchhuah siamin, Mizorama zirna-in hrang hranga zirlaite'n India ram state dangte zirna leh hmanraw dawn ang an pha lo lutuk niin an tarlang a; sorkarin zirtirtu transfer & posting rules a duan tawh chu rang taka hman a nih theih nan thuneitute an ngen nawn tih sawi bawkin, "Mizoram chhunga zirlaite leh zirtirtute dinhmun chiang zawka zirchianna neia tlawh chhuah tum a ni," an ti. 

Mizorama sorkar sikulte hian state dang sorkar sikulte an phak lo tihte hi mipui nawlpui tán hriat ngawt theih a ni lo a, zirlai pawl lamin hetiang an rawn sawi chhuak hi a lawmawm hle. State dang sorkar sikul hmanraw dawn ang an dawng phak lo a nih phei chuan thil serious tak a ni a, ngawih bopui mai loa bawhzui zel chi a nih hmel. 

Zirtirtu transfer leh posting chungchang hi chu sorkar awm tawh zawng zawng mualpho tawhna a ni a, kan sorkar thar pawhin zirtirtu awm sâ siam rem an ngam lo a, a lâk belh zawngin bul an ṭan a tih theih ang. Zep thu a cheng lo a, Aizawla sorkar sikul ṭhenkhat chuan zirlai a zawnin an zawng khawm a, zirtirtu an tam si a, zirlai an tlem si a, zirlai neih loh vanga sawn darh leh sikul khar mai an hlauhthawn avangin zirlai tur a zawnin an zawng a, sikul ṭhenkhat chuan an chhungte ṭanpuina thlengin an siamsak hial a ni awm e. 

Hetihlai mêk hian zirtirtu indaihlohna sikul thingtlang lamah tam tak a awm a, chu ta thawk tur chuan kan sorkar hian a mi chhawr zirtirtute a sawn chhuak thei lo mai a ni lo a, he sorkar thar hnuaiah pawh hian thingtlang zirtirtu ṭhen­khat thil tithei deuhte chu khaw­puiah an lalut leh mêk tawh a ni. 

Zirlai pawl hian thil hrang hrang an vei ṭhin a, a chang chuan an kuang lo nawr anga puh hial khawpin an tih tur ni awma lang lo thlenga an buaipui chang a awm. Tun ṭuma an thil vei erawh hi chu zirlai pawl pawhin an vei awm tak a ni a, a hlawhtlin ngei theihna turin theihtawp chhuah ngei rawh se.