Mizoramah ruihhlo a hluar hle

Tun hnaiah Mizoramah ruihhlo a hluar a, YMA-in ruihhlo a do vanglaia ruihhlo dotu pawl Supply Reduction Service (SRS) a siam ang kha tunah hian kan ramin a mamawh thu Home Minister chuan a sawi chhuak hial a ni.

Kan ramah ruih­hlo a hluar tih chu tun hnaia State Level Core Committee on Ruihhlo Do report-ah khan chiang takin a lang. Kum 2021 chhung khan heroin Kg 18.906 man a ni a, kum 2022 chhungin May 15 thleng khan heroin kg 10.081 man a ni tawh.

Kum 2021 khan ganja hi kg 376.2 man a ni a, kuminah ganja kg 68.8 man a ni tawh bawk; hengte hi Excise & Narcotics Department-in an man chin ringawt a ni a, man loh hi hei aia tam a awm ngei a rinawm.

Hei hi kan ram dinhmun dik tak chu a ni mek a, zu kan khap avangin ruihhlo a hluar ta ti pawl an awm bawk. Zu zawrh chhung pawh khan ruihhlo hi a hluar reng tho ti an awm bawk ang a, inhnialna tawp thei lo a nih hmel. Tunah chuan inhnial hman a ni tawh lo a, ruihhlo do tura kan zavaia kan ṭan tak tak a hun ta.

Ruihhlo avanga thi an pung zel a, tleirawl leh rawltharah ruihhlo ti thar an pung bawk nen, tun ang zela awlsam taka ruihhlo lei tur a awm chuan kan hmabak hi a thim a tih loh theih loh. Sorkar hian ruih­hlo do a ṭulzia a sawi fo tawh a, a tak taka beihpui thlakna hnuhma hi hmuh tur a la awm meuh lo a, tunah phei chuan SRS-te an au ta ruai a ni ber.

Hlawh pawh nei lo mi tlawm­ngai intel khawmte hnathawhin ruihhlo do kawngah awmzia a nei tham a nih chuan, kan police leh Excise force neih sate hi han ṭang ve leh deuh se, heti tak maia ruihhlo hluar hi chu thui tak a ven theih ngei ang.