CS dan tum tawh lo

NGO Coordination Committee (Joint NGO)-in Mizoram chief secretary atan Mizo ngei dah an phût avanga chief secretary Dr Renu Sharma pisa kái tur dan an tum chu an ṭhulh a, dan tumna an nei tawh rih lo. Joint NGO hruaitute chuan sorkar laipuiah Mizo ngei CS dah tura nawr chhunzawm zel an tum thu an sawi thung.

Chief Secretary atana Mizo ngei dah tumin Joint NGO chuan Chief Sec­retary Pisa kai tur dan an tum a, Chief Secretary hi a chawlh avangin an dang ta lo. Hetihlai hian social media lamah te, chanchinbu lamah leh tlâng titiah Joint NGO hian thlawp an hlawh vak lo niin a lang.

Chief Secretary atana Mizo tling an awm phawt chuan Mizo ngei neih theih hi duhthusam a ni; nimahsela chu thil thlentir tumna lama mi pisa kai tur dan tum erawh ruahmanna ṭha ber niin a lang lo.

Pawl intelkhawm hian thil tam tak a ti thei ṭhin a; nimahsela pawl intelkhawm lian tak pawhin a nawr kal hleih­theih loh thil hi a awm ve a, chumi zingah chuan mahni duh thu ngeia Mizoram chhuahsan Bru-te electoral roll aṭanga paih tura nawrna pawh kha a tel awm e.

Kan rama pawl hrang hrang leh pilitical party-te kan inlungrual chung pawhin thuneitu lamin dan tlawh chhan neiin an thu an zawm duh si lo a, dik inti tak chung siin kan duh loh thil a thleng reng a nih kha.

Chief Secretary atana Mizo ngei dah phei hi chu ṭan chhan ṭha tak neih a har a, ngenna piah lama tharuma mi pisa kai tur dan hmanga Chief Secretary siksawi tumna hi chu thil finthlak ber a ni lo a, a hlawhtling lo ang tih a rin theih sâ reng a ni.