Dan loa chete dan anga man

Hachhek Bial Kuhva Chingtu Pawl (HBKCP) chuan, Myanmar aṭanga dan loa kuhva tawlh rûk titawp vek tur leh June 2022 ral hma ngeia Myanmar kuhva dan loa Mizorama tawlh rutute man tur leh hrem turin Chief Minister an ngen a, an ngennain awmzia a neih loh chuan a theihna apiangah zualko an tum.

Tun hnaia kan hmuh tâk fo mai chu kuthnathawktuten sorkar an karna lam thu a ni a, a bikin kuhva chingtu lam hian sorkar hi dan anga kal turin an ngen nawn ta fo mai. HBKCP hi dan loa kuhva tawlhruk tuartu an ni a, dan anga hnathawktuten dan loa thil tawlh rutute tihdik loh an lo tuar hi a fel lo takzet a ni.

Mizoram sorkar hian tun hnaiah SEDP hnuaiah kuhva ṭiak ṭhahnem tak a sem chhuak leh tawh a, hei vang tal pawh hian Myanmar lam aṭanga a ruka kuhva tawlh hi chu a ngaimawh tur a ni.

Kuhva ṭiak hi sem chhuak miah lo pawh ni se ram dan kalha smuggling lian tak kalpui reng hi chu a 'mit a siai' mai mai tur a ni lo a, huaisen takin dan angin a che tur a ni ang.

Lirtheia langsar taka smuggling an kalpui ngam avang khan kuhva rah tawlhruk chu lian takin kalpui a ni a, chu chu kuhva chingtuten an tuar ta a ni. Mizoram sorkar hian smuggling hi a titawp mai ni loin a tidik lotu chu a man ngam bawk tur a ni.

HKCP phût ang hian he smuggling kalpui ṭhin hi titawpin dan bawhchhia an awm a nih chuan dan angin man ngam se smuggling hi chu a ziaawm ngei ang.