Health Care leh mipuite

Health & Family Welfare (HFW) minister chuan, Mizo­ram State Health Care Scheme (MSHCS) hnuaia leiba tam lutuk tihziaawmna atan theihtawp an chhuah mek niin a sawi a; mipuite chu lo nghâk hrâm hrâm turin a chah.

Hetihlai hian Chief Minister chuan tun hnaia a thusawinaah Cong­ress party-in kum 10 sorkarna an chan chhungin MSHCS atan cheng khat mah an dah lo niin a sawi a, MNF-in sorkarna an siam leh hnuah sum ṭhahnem tak dahin health care siam ṭhat tuma an beih thu a sawi.

Tun dinhmunah hian Mizo­ram sorkar hian damlo inen­kawlna bill a ba hnem hle mai a, RTI Act hmanga zawhna an chhânna aṭanga a lan danin health care hnuaiah hian inenkawlna senso hi April 2021 thleng pek a ni tawh a, bill pek loh Rs 68,63,52,238 a la awm a ni.

Damlo inenkawlna senso hi sorkar hian engtin nge a pek dâwn hriat a ni lo a, Health Minister chuan puk tur zawn loh chuan tihngaihna a vang hle tih a sawi. Hei hi thil awm dan dik tak pawh a nih hmel a, Mizoram sorkar sum bawm en hian damlo inenkawlna senso pek hi thil harsa tak a nih hmel. Chutihlaiin sorkarin a ngaih pawimawh zawngah chuan sum a awm thei zel a, pawisa ba hi a pek theih dan a dap a ngai a ni mai.

Damlo harsa tak takin health care lama an bill tang hmuh hlan nghak­hlel takin an thlir a, SEDP hnuaiah damlo tán pawisa pek chhuah theih anga sawi kha tunah hian a tâng tam ta hle a ni.

MSHCS bill tang avangin chhungkaw tam tak an mangang a, he mi chung changah hian in sawithiam tum ni awm taka midang tih loh lam sawi loa a taka bill pek dan zawn mai hi sorkar tih tur chu a ni awm e.