Union Minister zin hlawkpui ila
Minister of Fisheries, Animal Husbandry and Dairying, Parshottam Rupala chu tun hnai khan Mizoramah a lo zin a, Mizoram Chief Minister nen an inkawmnaah ran hri leng avanga ran vulhtute harsatna sut kian a awlsam zawk theihna turin insurance policy leh insurance undertaking hrang hrangah sorkar laipui nena hma la tura state-in proposal siam pawimawh a tih thu a sawi.
African Swine Fever avangin Mizoramah vawk 37,000 chuang an thi tawh a, hei hian chhungkaw tam tak eizawnna nasa takin a nghawng a ni. Kum 2021 aṭanga vawk pul hri leng hian ziaawm lam a pan deuh hnuah tun hnaiah a pung leh tawh a, district hrang hrangah vawk thi an pun leh mek a ni.
Sorkar laipui pawhin ASF avanga vawk suatte tan zangnadawmna pek tumin sum leh pai ṭhahnem tak Mizoram sorkar a pe tawh a, heng zinga zatve Rs 5,84,97,000 pek chhuahna tur chu tunah hian Finance department lamah dil mek a ni.
Kan ram dinhmun en hian eng tik hunah pawh vawk leh ran dang hri hi leng thut thei dinhmunah a ding reng a, hei vang hian insurance policy ṭha tak neih hi tihmakmawh a ni. Union Minister rawtna hi state sorkarin chak takin bawhzui se, ran vulhtute tana chhenfakawm tak insurance policy hi awm thei se a ṭha hle a ni.