Health Care sum leh a chhehvel

Mizoram Pradesh Congress Committee (MPCC) chuan Mizoram Chief Minister chu Mizoram State Health Care Scheme (MHSCS) chungchanga dâwt sawiah an puh a, June 2022 chhung ngeia thupha cháwi turin an phût.

MHSCS-ah hian sum mipuiin an thawh tawh bakah sorkarin eng emaw zat a dah a, chumi pung aṭang leh thil dang aṭangin sorkarin damlo in­enkawna bill a pe chhuak ve tur, tih a ni. Tunah hian MHSCS-a sum dahtu nih inchuhin kan political party lam an inhnial buai a, chutihlaiin mipui chu health care aṭanga sum hmù thei loin an buai thung a, a zialo hle a ni.

Congress party hian Chief Minister hi dawt sawiah an puh a, RTI Act hmanga zawhna chhannaa a lan danin Congress hian an sorkar hunlaiin pawisa an dah ngei niin a lang a, Chief Minister hian an dah loh thu a sawi thung a, thudik lo sawi zawk chu an awm ngei tih a lang.

Kan political party lamin sum thawhtu nih an inchuh laiin mipui­in sum dawn tur an nei lo thung a, cheng nuai 6,000 chuang damlo inenkawlna man MHSCS hian a ba mêk bawk a ni.

Pawisa thawhtu tihchian ran a ṭha a, chu aia hman­hmawhthlak chu pawisa pek chhuah hi a ni.