Vawk vulhtute zangnadawmna pek ni thuai se

Vawk pul hri African Swine Fever (ASF) avangin Mizoramah vawk tam tham tak suat a ni tawh a, vawk suatsak neitute hnena pek tur hian sorkar laipui chuan zangnadawmna Rs 5,84,97,000 chu kumin March-ah khan a pe chhuak tawh a, hei hi first instalment a ni.

Zangnadawmna hi sorkar laipui leh state sorkarin an intum sem tur a ni a, Mizoram sorkar chuan a tum ve tur pawisa a la pe chhuak lo a, tun thlengin vawk vulhtute hian pawisa an la dawng lo.

Mizoram sorkar sum dinhmun a ṭha tawk lo tih te hi chu vawi tam kan lo hre tawh ṭhin a, chutihlai chuan kan sorkar tho hian a ngaih pawimawh lamah chuan mipui sawisel huai huai khawpa tam sum hman tur a nei leh tho si ṭhin tih kan hmu. Tuna sum a la pek chhuah ve loh hi chu vawk pul hri avanga mi mangang vawk vulhtute hnena pek tur a ni a, hei hi chu a rang thei ang bera pek chhuah a ṭha hle a ni.

Vawk vulhtu, hripui leng avanga an vawk an suatsak takte hi mi tam tak chu an eizawnna ber vawk vulh a nih avangin an mang­ang takzet a, anni tan a thla chu sawi loh kar hnih khat lek an pawisa dawn tur hrensak hi thil pawi tak a ni.

Ṭanpuina pe tura kan zuk dil zawk sorkar laipui lamin March 22, 2022-a zangnadawmna sum an rawn pek tawhlaia June thla laihawlah pawh vawk vulhtute'n zawna­dawmna an la dawng thei lo hi a fel lo takzet a ni.

Mizoram sorkar hian vawk vulhtute zangnadawmna pawisa hi a rang thei ang berin pe chhuak rawh se.