MLA bân thu

ZPM Legislature Party (ZLP) leader Lalduhoma, Serchhip bialtu chu Assembly speaker Lalrinliana Sailo chuan MLA aṭangin bàn. Lalduhoma hi MNF MLA 12-in dan bawhchhiaa puhin bàn turin Speaker-ah an hêk a; independent MLA ni chungin ZPM party tán a inhmang nasa lutuk tih chu an hekna ki ber a ni. 

Congress Legislature Party Leader chuan he­tianga MLA bân a ni hi mak a tih thu leh pawi a tih thu a sawi a, amah anga thlan tlin MLA dangte bân ve si loa Lalduhoma chiah an bân hi mimal inhuatna vanga a ngaih thu a sawi. Lalduhoma chuan politics-a phuba lakna vangin an bân ta tiin a sawi a, amah thlang tlingtu mipuite a phatsan loh thu a sawi. 

Mizoramah hetianga MLA nihna hlihsak an awm vawi­khatna a ni a, engnge nghawng a neih zel dâwn hriat ni lo mah se heti mai hian a tawp lo ang tih chu a rin theih. 

Kum 2018 MLA inthlan dâwn khan ZPM kha Election Commission of India hnuaiah an la inziak lut hman lo a, chawp­chilh taka inhlawm khawm an nih avangin independent-in an in candidate hlawm a ni. Chutihlaiin an zavaiin symbol thuhmun an nei a, manifesto inang vek an hmang a, flag leh campaign au hlate pawh a inang vek an hmang. 

ECI-ah an inziak lut fel hman lo tih loah chuan ZPM hming veka awm an ni a, Lalduhoma phei chu ZPM an tlin chuan Chief Minister tura an zawrh a ni a, ZPM hminga a inzuar hi mipuiin bial hnihah an thlang tling nghe nghe a ni.

MNF-a an MLA 12-in an MLA pui bâng tura an han hêk ngawt mai hi Mizorama thil thlengah chuan thil mak tak a ni a, chutih rualin politics-a dingchang zawk nih tumna a nih chuan eng pawh thiang vekah an ngai pawh a ni thei. 

Engpawhnise tunah chuan Speaker-in dan ngaih pawimawh vangin MLA hi a bân niin a insawi a, dan a ngai pawimawh chhunzawm zel dâwn nge dâwn lo tihte mipuiin an ngaichang zel dâwn a, he thutlukna hi Mizoram political history-ah a chuang reng tawh dâwn a ni.