Raltlante leh ruihhlo

Central YMA President chuan, "Kan unau ṭhenkhat raltlante'n ruihhlo kan ramah min rawn pe a, heng hi kan mamawh lo a, Mizoramin a mamawh lo a, kan hnam chhiatna bul a ni," tiin Myan­mar aṭanga raltlan lo lutte chu ruihhlo tawlh lo turin YMA Day-a a thusawinaah a chah.

Tun hnaiah Mi­zoramah nasa takin ruihhlo a hluar mek a, a chhan ni thei tur pawh tam tak sawi a ni. Mi ṭhenkhat chuan kuhva a hlawm liana tawlhruk karah ruihhlo an tawlh tel ṭhin niin an puh a, chu chu a theih tak loh avangin ruihhlo hi a lo lut tam ta hle nitein an rin thu an sawi a, hei hi chu finfiahna awm lo rin thu mai a ni.

Chutihlaiin raltlan zingah ruihhlo keng lut an awm tih erawh a thleng dik chho mek a, hei hi a pawi takzet a ni. Raltlante hi an dinhmun dik tak chu an sahimna zawnga Mizorama lo lut an ni a, kan unaute an nih angin kan tuamhlawmin kan chhawmdawl tur a ni reng a ni. Heng raltlan tam zawkte hi chu inthlahrung tak leh mangang tak sia lo lut an ni hlawm a, an unaute hetah kan awm a, kan lo dawngsawng tur a nihlaiin ruihhlo tawlh ru an lo tel ve erawh a pawi takzet a ni.

Raltlan zingah ruihhlo tawlh ru an tel ve a tih theih rualin ruihhlo tawlh ṭhinte'n raltlan lem an rawn chang pawh a ni zawk thei a ni. Engpawhnise Myanmar lama Zohnahthlak unaute zinga Mizo­ram ṭhalaite chhiatna leh thiha hial thlen thei ruihhlo tawlh ru duh an lo awm hi a vanduaithlak a, Central YMA President sawi ang hian kan mamawh lo a, kan hnam chhiatna thlentu a ni.