Municipal Council thuneihna

Aizawl Mayor chuan Local Coulcil chu Aizawl Municipal Corporation hnuaia awm an nih avangin sorkar department dangin an chhawr dawn a nih chuan AMC aṭanga phalna an neih hmasak a ngai tih a sawi.

Mizoramah hian sorkar leh pawl kalphungah pawh thil hi kan chik tawk loh ṭhin avangin miin dan ang taka thil an kalpui dawn chuan thuneihna chelek leh intilal ang maiin kan chhuah ṭhin a, thil nihna kan hriat chian tawk loh vang a ni fo.

Municipal Cor­poration hian an huam chhungah chuan thuneihna sang tak a nei a, hei hi Aizawla kan Municipal Corporation-te hian a nihna tur angin an la hmang chhuak tawk lo zawk niin a lang. State ṭhenkhatah chuan an sorkar leh Municipal Corporation inhnial deuh rap rap leh thil ṭhenkhatah phei chuan a indo ang hiala ngaih theih turte pawh a awm a ni.

Hetihlai hian Aizawla kan Municipal Corporation hian thupek a chhuah ṭhenkhatah hian a thupeka duhtawka a bawhzui lama tihṭhat loh a nei nual a, thil ṭhenkhat phei chu mipui tana harsatna thlen tawk lek, a ṭhatna hmang chhuak tura a bawhzui chak loh deuhte pawh a awm niin a lang.

Thuneihna sang tak nei Municipal Corporation hian a hnuaia Local Council-te a hum­halh ang bawk hian an mawh­phurh­na hi ṭha zawkin hlen se. Kan khawpuia mi cheng zat leh Municipal Corporation budget-te thlir hian tun aia chak leh awmze nei zawkin Municipal Corporation hi a kal thei ngeiin a rinawm.