Oil khuahkhirh

Mizoram Merchant Association (MIMA) chuan thuchhuah siamin, harsatna avanga state pawn aṭanga tuialhthei lakluh theih a nih lohlaia sorkarin tuialhthei a khuahkhirh ṭhin chu ṭha an ti lo a, mipui a tihchiai bakah mipui nawlpuiin an lak theih lohlaia sorkar lirthei tana coupon-a an la thei chu ṭha an ti lo a, lirtheia eizawngte an mangan thu an tarlang.

Oil a van nikhua hian The Mizoram Trade Articles (Licen­sing and Control) Order, 1987-in thuneihna a pek angin Food Civil Supplies and Consumer Affairs lamin oil hi an khuahkhirh ṭhin a, dan tlawhchhan tur awm a ni.

Oil a van changa harsatna a awm a nih pawhin sorkar inrelbawlna tluang taka a kal theihna turin sorkar mi pawimawhte'n oil an nghei lohna turin ruahmanna siam ṭhin a ni a, mipui hnenah a daihzai thei anga sem a ni ṭhin bawk.

Hetihlai hian Mizorama kan hmuh chu oil a vang tih thawm a awm ruala petrol pump (filling station) lam pana kan chhuak khawm ṭhin hi a ni. A hman remchang apiangin bûra dawh tumin oil harsat chhunga an tla tur lak khawl an tum bawk ṭhin. Hengte avang hian sorkar tan pawh khuahkhirhna siam a, a daihzai thei anga sem rual hi ruahmanna ṭha ber a ni ve thei.

Sumdawng pawl lam hi chuan lirtheia eizawngtute hma ngai takin an sawi a, a eizawngtu ber pawhin oil lei tur an neih lohlaia sorkar mi leh sate'n awlsam taka an lei thei bik hi a fel loin a hria a ni. Sorkar pawhin oil harsat laia coupon a pek chhuah dan hi ennawn se, oil lei kawnga mimal lirtheite'n harsatna lian tak an tawh laia sorkar mi leh sate'n awlsam taka coupon an la nei zung zugn reng hi chu ennawn a ṭha khawp mai.